VOV4.Êđê - Hlue si asăp jak iêo mơ̆ng khua kiă kriê, lehanăn knŭk kna ala čar Russia, Khua knŭk kna Phạm Minh Chính nao hlăm klei bi kƀĭn trông čhai kơ bruă duh mkra Êgar Ngŏ mkŏ mjing leh ti ƀuôn prŏng Vladivostok, ala čar Russia, mkŏ mjing hlue hdră mđupng rup. Hlăm klei blŭ hrăm, Khua knŭk kna mñă, klei bi trông anei jing yuôm bhăn čiăng hyuă kjăp hĭn klei bi mguôp lu ala čar, đru krơ̆ng kjăp klei mđĭ kyar alŭ wăl Asi – Pacific; lehanăn hlăm tar rŏng lăn.

Khua knŭk kna lač, Việt Nam păn kjăp hdră êlan klei duh mkra êngiê, lehanăn jih ai tiê bi hgŭm hŏng lu ala čar mtrŭn agha hŏng klei êlan hĭn. Kơ klei bi mguôp dua nah Việt Nam Russia, ƀuh jing mâo klei tŭ dưn jăk hlăm dŭm thŭn leh êgao, boh nik hlăm bruă êa pui, bruă tuh tia, lehanăn dŭm mta bruă mkăn. Hmei čiăng lŏ mđĭ hĭn klei hgŭm hlăm djăp mta ti dŭm bruă dua nah mâo klei găl, pai mă klei êngiê kơ klei duh mkra mnia mblei Việt Nam mâo kuôl kă leh hŏng êpul hgŭm duh mkra Asi – Ơrôp. Khua knŭk kna bi mni kơ klei bi mguôp bruă duh mkra hŏng Russia, boh nik hŏng krĭng Ngŏ Russia, hŏng dŭm ala čar Asi – Pacific, mtrŭt klei bi mguôp kluôm ASEAN hŏng Rusia./.

Y-Khem pô mblang