VOV4.Êđê- Tlam mbrue (10/2), ti Hà Nội, Khua knŭk kna Phạm Minh Chính nao lehanăn blŭ hrăm kiă kriê ti anôk bi êdah Hdră klei suaih pral ti sang hră mơar wưng thŭn 2021 – 2025 mâo mkŏ mjing online mơ̆ng anôk bruă bi kƀĭn hŏng tač êngao Hà Nội, mkŏ leh hŏng 63 boh čar, ƀuôn prŏng lehanăn mkŏ hŏng êbeh 63 boh čar, ƀuôn prŏng, lehanăn mkŏ hŏng êbeh 41 êbâo 950 boh sang hră hlăm kluôm ala. Mbĭ hŏng klei lŏ wĭt pŏk ƀăng sang hră mơar hlăm kluôm ala, anei jing bruă yuôm bhăn, bi klă klei gĭr prŏng mơ̆ng Đảng, lehanăn knŭk kna hlăm bruă dlăng kriê klei suaih pral kơ phung hđeh hriăm hră. Hdră klei suaih pral ti sang hră mơar wưng thŭn 2021 – 2025, bi klă leh 5 êpul bruă phŭn, lehanăn 7 hdră mghaih msir kơ bruă dlăng kriê klei suaih pral kơ phung hđeh hriăm hră, đru kơ hđeh hlăm kle imjuăt ktang asei mlei ti sang hră, mkŏ mjing klei huă ƀơ̆ng ti sang hră, djăp mnơ̆ng ƀơ̆ng tŭ jăk, ba yua hdră mrâo mrang hlăm klei kiă kriê, gĭr gai, ksiêm dlăng čih yap hâo mdah hâo hưn, mjuăt bi hriăm kơ klei suaih pral ti sang hră mơar. Blŭ hrăm ti anôk anei, Khua knŭk kna jao leh bruă kơ dŭm phŭn dhar bruă, alŭ wăl bi hgŭm mkŏ mjing, ngă mđrăm hŏng jih jang bruă kñăm kiă kriê jăk klei suaih pral kơ phung hđeh hriăm hră./.

Pô mblang: Y-Khem Niê