VOV4.Êđê- Tlam mbrue (19/4), Khua knŭk kna Phạm Minh Chính mâo leh klei bi blŭ hrăm hŏng Om Birla, Khua bruă kƀĭn ala nah gŭ India ƀri ñu mâo gưl hriê čhưn lehanăn mă bruă ti Việt Nam. Khua knŭk kna lač, Việt Nam hơ̆k mơak mâo drông, lehanăn mjing djăp klei găl kơ phung duh mkra India mđĭ hĭn klei duh bi liê kơ bruă mkra mjing êa drao, kơ bruă nah gŭ, kơ kdrăp mkra mjing, bruă hâo hưn, bruă sinh học, bruă mkra mjing pui kmlă bi êran hŏng pil yang hrue, lehanăn ai angĭn, bruă lŏ hma ênuk mrâo, mlih mrâo hŏng klei mbruă.

Khua knŭk kna čang hmăng lŏ dơ̆ng krơ̆ng kjăp jih jang klei bhiăn hgŭm mbĭt, hlăm anăn mâo klei bhiăn bi hgŭm knŭk kna, mđĭ hĭn klei bi mguôp bruă lĭng kahan, bruă dhar kreh hiu čhưn ênguê, klei bi mguôp phung ƀuôn sang, bruă mjuăt bi hriăm, bruă bi mlih mrô, bi đru hlăm bruă mnia mblei êa pui êwa čuh, mdrơ̆ng hŏng klei bi mlih yan adiê, lehanăn klei hgŭm bruă êa ksĭ, êa pui êwa čuh. Khua knŭk kna čang hmăng kơ India lŏ dơ̆ng đru, mjing djăp klei găl kơ mnuih lehanăn phung duh mkra Việt Nam hdĭp mda, hriăm mjuăt, lehanăn mă bruă ti ala čar India./.

Pô mblang: Y-Khem Niê