VOV4.Êđê - Leh anôk bruă tĭng mkăp mơ̆ng ala čar Mi mđĭ ênoh prăk mnga thiăm 0,75 puăng kdrêč êtuh hlăm mlam êgao lehanăn dŭm knơ̆ng prăk gưl dlông Ơrôp lehanăn lu ala čar mkăn mâo leh lu gưl mđĭ ênoh prăk mnga kñăm čiăng mdrơ̆ng hŏng klei prăk luič ênoh êdi wưng giăm anei, aguah mbrue (28/7), Khua knŭk kna Phạm Minh Chính kiă kriê leh klei bi kƀĭn hŏng phung khua phŭn bruă, lehanăn phung khua kiă kriê dŭm phŭn dhar bruă tui duah hdră êlan jăk hĭn kñăm dưi mkhư̆ klei prăk luič ênoh, bi hơĭt bruă duh mkra kluôm, lehanăn lŏ bi kơrŭ bruă duh mkra ala ƀuôn. Khua knŭk kna mtă, klei duh mkra ala čar drei mâo klei găl prŏng, ƀiădah hnơ̆ng ngă bruă adôk êdu, ai dưi mdrơ̆ng hŏng djăp mta klei amâo mâo jăk jing awăt, kyuanăn tơdah knŏng tuôm mă hŏng sa klei bi mlih điêt mơ̆ng nah êngao sĭt nik srăng hmăi amâo mâo jăk prŏng hlăm ala čar. Ti anăp klei msĕ snăn Khua knŭk kna mtă kơ jih jang dŭm phŭn dhar bruă, alŭ wăl bi ksiêm nik păn kjăp boh klei, mâo nanao klei răng, thâo bi ksiêm dlăng mghaih msir hŏng klei knhăk, mâo hdră êlan djŏ, pral, kreh knhâo, tŭ dưn êjai ară anei lehanăn kơ mgi dih./.

Y-Khem pô mblang