Dua khua kiă kriê mơak hŏng dŭm boh tŭ dưi mâo hlăm hdră mđĭ kyar klei bi mjĕ dua nah. Singapore krơ̆ng kjăp jing ala čar duh bi liê dôk mrô 2 mơ̆ng tar rŏng lăn hlăm Việt Nam; thiăm 2 wăl tuh tia mkra mjing Việt Nam – Singapore dưi mkăp hră tŭ ư brei duh bi liê rŭ mdơ̆ng, mjing wăl anôk 20 krĭng wăl VSIP ti 14 čar, ƀuôn prŏng Việt Nam, ênoh prăk bi mnia mblei dua ala čar đĭ kyar hơĭt kjăp, mâo 10,3 êklai USD hlăm thŭn 2024. Việt Nam jing ala čar ba čhĭ braih lu êdi hlăm Singapore.

Dua khua kiă kriê tŭ ư kơ dŭm hdră msir “Pral, djŏ guôp” čiăng mđĭ klei đăo knang hlăm bruă kđi čar, mjing boh kdrŭt mrâo kơ Klei bi mjĕ ƀĭng hgŭm phŭn kluôm dhuôm, ti anăp jing bi leh ênŭm lehanăn hluê ngă tŭ dưn hdră ngă bruă hlăm jar klei bi mjĕ wưng thŭn 2025 - 2030.  Dua tĭng tŭ ư brei mđĭ hdră bi trông hluê êpul, bi tuôm gưl dlông lehanăn dŭm gưl; pŏk hluê ngă dŭm klei bhiăn bi hgŭm bruă dua nah, boh nik klei bhiăn Bi kƀĭn grăp thŭn plah wah Khua knŭk kna dua ala čar./.