VOV4.Êđê- Tlam 17/6, Khua knŭk kna Phạm Minh Chính gĭt gai klei bi tuôm mơ̆ng Dhar bruă knŭk kna hŏng dŭm anôk bruă klei mrâo ƀri gưl bi hdơr 97 thŭn hruê klei mrâo Cách mạng Việt Nam (21/6). Leh mding hmư̆ klei blŭ mguôp mơ̆ng khua gĭt gai dŭm anôk bruă klei mrâo, blŭ hrăm hlăm klei bi tuôm, Khua knŭk kna Phạm Minh Chính mñă klă: Hră klei mrâo jing kban mkŏ čiăng mkăp klei hâo hưn kơ yang ƀuôn kơ boh klei duh mkra- ala ƀuôn mơ̆ng lăn čar, lač kơ boh klei ala ƀuôn,  thâo ƀuh klei ƀơ̆ng ngăn, luič liê mang, hdră êlan êdu kƀah brei mkra mlih.

Khua knŭk kna bi mklă, dŭm klei hâo hưn anăn jing yuôm bhăn snăk hŏng bruă gĭt gai mơ̆ng Knŭk kna, knŭk kna ktuê dlăng, mđing hmư̆ nanao klei mĭn mnuih ƀuôn sang mơ̆ng hră klei mrao čiăng mâo hdră msir mgaih bi djŏ guôp. Bi ala kơ Knŭk kna, Khua knŭk kna hơêč hmưi, bi mni  kơ klei đru mguôp mơ̆ng hră klei mrâo ala čar, đru mbĭt hŏng Đảng, Knŭk kna čiăng dưi mâo lu klei tŭ dưn yuôm bhăn./.

                                               Pô mblang: H’Zawut Ƀuôn Yă