VOV4.Êđê- Ti anôk bi tuôm hŏng êpul čưng boh mniê ala čar tlam 10/2, Khua knŭk kna Phạm Minh Chính mñă klă: Hŏng klei tŭ dưn, klei gĭr ktưn gưl tal êlâo hlăm hƀuê ênuk Êpul čưng boh mniê ala čar drei mâo mă klei dưi nao bi lông hlăm World Cup 2023, kâo srăng pia jing phung mniê yuôm bhăn leh anăn mtô bi hriăm yuôm bhăn mơ̆ng klei mjuăt asei mlei Việt Nam. Khua knŭk kna Phạm Minh Chính mñă klă, bruă êpul čưng boh mniê ala čar mâo mă klei dưi nao bi lông hlăm World Cup jing klei tŭ dưn prŏng prĭn hlăm hƀuê ênuk čưng boh Việt Nam. Klei tŭ dưn anei jing klei mơak kơ jih ala čar hlăm dŭm hruê akŏ thŭn mrâo.

Khua Knŭk kna čang hmăng Êpul čưng boh krơ̆ng nanao klei gĭr čiăng dưi mâo klei tŭ dưn jăk hĭn hlăm dŭm klei bi lông kơ anăp, êlâo hĭn jing răng mgang klei tŭ dưn prŏng hĭn hlăm SEA Games 31 hlăm mlan 5 kơ anăp. Ăt hlăm klei bi tuôm, pô bi ala Adŭ bruă Knŭk  kna jao leh 4 êklai 5 êtuh êklăk prăk mơ̆ng đru ba ala ƀuôn, Knơ̆ng bruă Olympic Việt Nam mđup brei 3 êklai 6 êtuh êklăk prăk, Knơ̆ng prăk Duh bi liê mđĭ kyar Việt Nam mđup brei 2 êklai prăk, êpul grup TH mđup brei 1, êklai 5 êtuh êklăk prăk, hlăm anăn 1 êklai prăk leh anăn mnơ̆ng dhơ̆ng kơ Êpul čưng boh mniê ala čar Việt Nam.

Pô mblang: H’Zawut Ƀuôn Yă