Blŭ ti knăm anei, Khua knŭk kna Phạm Minh Chính mñă klă, ară anei, Việt Nam dôk krơ̆ng kjăp hdră đĭ kyar bruă duh mkra kluôm, ksiêm dlăng klei prăk luič ênoh; rơ̆ng nư dôk đuôm, klei bi liê bruă ngăn prăk, nư ala tač êngao, nư Knŭk kna hlăm hnơ̆ng dưi brei; klei êđăp ênang, klei kluôm dhuôm krĭng lăn, klei êđăp ênang ala ƀuôn, răng mgang wăl hdĭp mda dưi rơ̆ng kjăp; mtrŭt mđĭ hdră gang mkhư̆, bi kdơ̆ng hŏng klei ƀơ̆ng ngăn, hdră bruă hŏng tač êngao mâo ba wĭt lu boh tŭ dưn.

Hlăm wưng ti anăp, kơ mta kñăm, Khua knŭk kna mñă, mta kñăm phŭn gĭr ktưn truh kơ thŭn 2030 (bi hdơr 100 thŭn hruê mkŏ mjing Đảng) jing ala čar dôk đĭ kyar, mâo bruă tuh tia mkra mjing mrâo, hnư hrui wĭt kah knar đĭ; truh kơ thŭn 2045 (bi hdơr 100 thŭn Hruê mkŏ mjing ala čar) jing ala čar đĭ kyar, mâo hnư hrui wĭt đĭ. Thŭn 2024 dưi bi mklă jing thŭn đĭ kyar, mâo boh tŭ yuôm hlăm bruă hluê ngă tŭ dưn Hdră kčah 5 thŭn 2021-2025 lehanăn Hdră êlan 10 thŭn 2021-2030, hlăm anăn, boh tŭ thŭn 2024 brei kdlưn hĭn thŭn 2023 msĕ si klei gĭt gai mơ̆ng Khua gĭt gai Đảng Nguyễn Phú Trọng./.