Leh truh ti ƀuôn prŏng phŭn Bắc Kinh mphŭn nao čhưn klă sĭt ti China leh anăn nao hlăm klei bi kƀĭn grăp thŭn phung ba anăp tal 14 mơ̆ng Klei bi kƀĭn Bruă duh mkra dlông rŏng lăn (WEF), Khua knŭk kna Phạm Minh Chính bi tuôm hŏng phung knuă druh dŭm anôk bruă bi ala leh anăn êpul êya mnuih Việt Nam ti China.

Blŭ hrăm hlăm anôk bi tuôm, Khua knŭk kna Phạm Minh Chính mñă klă, Đảng leh anăn knŭk kna dlăng myuôm êpul êya mnuih Việt Nam ti ala tač êngao, hlăm anăn mâo mnuih Việt Nam ti China, jing sa kdrêč amâo dưi bi ktlah ôh mơ̆ng êpul bi hgŭm djuê ana, jing sa hlăm dŭm boh kdrŭt, phŭn agha ai ktang mđĭ kyar lăn čar. Hlăm wưng kơ anăp, Khua knŭk kna mtă kơ mnuih Việt Nam ti China lŏ dơ̆ng mđĭ lar ai tiê bi khăp bi đru, mđĭ klei ktưn hưn djuê ana, ai tiê bi hgŭm, bi đru hgao klei dleh dlan, gĭr ktưn, ñŭ kma, hlue ngă hdră bhiăn leh anăn đru mguôp kơ klei đĭ kyar ti ala čar dôk; klă sĭt jing phung mkŏ yuôm bhăn kơ klei bi hgŭm djuê ana leh anăn ƀĭng hgŭm bi hgŭm hdră bruă kluôm plah wah Việt Nam leh anăn China./.