VOV4.Êđê -  Tlam 13/9, ti Anôk bruă Knŭk kna, Khua knŭk kna Phạm Minh Chính bi tuôm hŏng Khua bruă kƀĭn ala Ala mtao Campuchia Samdech Heng Samrin dôk hriê čhưn klă sĭt ti Việt Nam.

Hlăm mmông drông, dua khua gĭt gai bi êdah klei tŭ ư kơ klei đĭ kyar hơĭt kjăp mơ̆ng klei bi hgŭm Việt Nam - Campuchia. Kơ hdră mđĭ klei bi hgŭm plah wah dua ala čar hlăm wưng kơ anăp, dua khua gĭt gai bi tŭ ư mđĭ lar klei bi tuôm, bi trông gưl dlông hlăm jih jang hdră kñăm amâo mdei mkra mđĭ klei bi hgŭm kđi čar đăo knang; dŭm anôk bruă čih mkra hdră bhiăn leh anăn hlue ngă hdră bhiăn dua ala čar lŏ dơ̆ng mđĭ lar bruă klam mđĭ kyar klei bi hgŭm, bi hdơ̆ng nao ai hlăm dŭm klei bi kƀĭn lu ala čar leh anăn krĭng wăl. Khua knŭk kna Phạm Minh Chính bi mklă Việt Nam nao ai leh anăn đăo knang Campuchia srăng ngă tŭ jing bruă klam Khua gĭt gai ASEAN leh anăn AIPA thŭn 2022./.

H’ Zawut pô mblang