VOV4.Êđê - Tlam mbruê 21/6, ti anôk bruă knŭk kna, Khua knŭk kna Phạm Minh Chính bi tuôm hŏng khua bruă kƀĭn ala Mozambique Esperança Bias dôk mâo klei hriê čuă Việt Nam, Khua knŭk kna Phạm Minh Chính hơêč hmưi kơ Mozambique gưl tal êlâo jing khua kiă kriê djŏ tuôr mơ̆ng Êpul gơ̆ng răng mgang klei êđăp ênang mơ̆ng Êpul hgŭm lu ala čar wưng thŭn 2023 -2024 leh anăn đăo knang Mozambique srăng dưi bi leh jăk bruă klam anei, đru mguôp hlăm klei êđăp ênang, bi mguôp leh anăn mđĭ kyar alŭ wăl leh anăn tar rŏng lăn. Khua knŭk kna mñă klă klei găl bi mguôp plah wah Việt Nam leh anăn Mozambique jing prŏng sơnăk, Việt Nam mprăp kah mbha klei thâo mđĭ kyar leh anăn bruă hŏng tač êngao, ñu kma hŏng Mozambique, ba mdah dŭm hdră êlan kñăm bi êlam hĭn klei mjĕ giăm 2 tĭng leh anăn hmăng hmưi bruă kƀĭn ala 2 ala čar lŏ dơ̆ng sa ai, mkŏ mjing klei găl kơ bruă hluê ngă. Khua bruă kƀĭn ala Mozambique mñă klă, Mozambique dlăng kơ Việt Nam jing sa hlăm dŭm ƀĭng hgŭm bi mguôp yuôm bhăn ti Asi, ƀuăn rơ̆ng bi lar bruă klam jing anôk bruă čih mkra klei bhiăn leh anăn mkŏ mjing klei găl kơ bruă mtrŭt mđĭ klei bi mguôp plah wah 2 ala čar.

Y-Ƀel pô mblang