Ti anôk bi tuôm, Khua kiă kriê Duma ala čar Russia mñă leh klei bi hgŭm kjăp hŏng Việt Nam pŏk ngă dŭm klei kuôl kă gưl dlông, ba klei bi mjĕ ƀĭng hgŭm phŭn Việt Nam – Russia ƀrư̆ hruê ƀrư̆ êlam, klă sĭt lehanăn tŭ dưn.

Ti anôk bi tuôm, dua tĭng mñă hlăm wưng êgao, klei bi mjĕ dua Anôk bruă kƀĭn ala đĭ kyar jăk siam, Anôk bruă kƀĭn ala dua ala čar bi hgŭm kjăp, tŭ dưn hlăm hdră dua nah lehanăn lu tĭng, pŏk ngă tŭ dưn klei bhiăn dôk mâo mơ̆ng dua ala čar, boh nik mkŏ mjing dŭm Klei bi kƀĭn mơ̆ng Dhar bruă bi hgŭm bruă kƀĭn ala. Dua tĭng đăo knang, anôk bruă kƀĭn ala dua ala čar srăng mjing djăp klei găl čiăng pŏk ngă klei kuôl kă plah wah phung khua kiă kriê gưl dlông dua ala čar, đăo knang anôk bruă hluê ngă hdră bhiăn dua ala čar hlăm wưng mrâo srăng hrăm mbĭt đru mđĭ hĭn klei bi mjĕ Việt Nam – Russia hlăm ênuk gưl bi hgŭm mrâo./.