VOV4.Êđê- Ti anôk bi tuôm hŏng Khua kiă kriê Êpul hgŭm lu ala čarAbdulla Shahid, ti New York, ala čar Mi, Khua knŭk kna Phạm Minh Chính bi mni dŭm klei mđing tal êlâo mơ̆ng Klei bi kƀĭn Êpul hgŭm lu ala čar tal 76 hlăm bruă mđĭ kyar h’ĭt kjăp, lŏ krŭ wĭt êdei kơ klei ruă tưp, mdrơ̆ng hŏng klei bi mlih yan adiê, mkra mđĭ Êpul hgŭm lu ala čar. 

Khua knŭk kna Phạm Minh Chính mñă klă, jing ala čar ktuê hang ksĭ, Việt Nam mđing êdi kơ bruă răng mgang klei êđăp ênang êlan êa ksĭ, hlăm anăn mâo bruă kriê pioh, ba yua êlan êa ksĭ, ba yua ngăn dŏ êa ksĭ, răng mgang wăl anôk êđăp ênang, h’ĭt kjăp lehanăn mđĭ bruă klam hluê ngă hdră bhiăn tar rŏng lăn, boh nik Klei kuôl kă Hdră bhiăn êa ksĭ thŭn 1982 UNCLOS, čang hmăng Khua kiă kriê êpul hgŭm mđing dlăng, mtrŭt mđĭ bruă anei djŏ guôp kyua anei jing klei mđing dlăng mbĭt, djŏ klă mơ̆ng dŭm ala čar hlăm Êpul hgŭm. Bi trông kơ dŭm bruă hlăm krĭng lehanăn tar rŏng lăn hdơ̆ng bi mđing, dua tĭng mñă klă klei čiăng êdi mơ̆ng hdră êlan lu tĭng lehanăn bi hgŭm hlăm tar rŏng lăn kñăm mdrơ̆ng tŭ dưn hŏng klei lông dlăng dôk mâo hlăm tar rŏng lăn, boh nik klei ruă tưp lehanăn klei bi mlih yan adiê./.

Pô mblang: H’Nêč Êñuôl