Hlăm mmông bi tuôm, Khua knŭk kna Phạm Minh Chính mñă klă Việt Nam dlăng yuôm bhăn bruă klam, kơhưm mơ̆ng Alemang hlăm alŭ wăl leh anăn tar rŏng lăn.

Čiăng mtrŭt mđĭ klei bi mguôp dua tĭng dôk đĭ kyar jăk siam, dua čô khua gĭt gai tŭ ư mđĭ hĭn klei bi trông dŭm gưl, boh nik jing gưl dlông, lŏ dơ̆ng bi mguôp, sa ai hdơ̆ng pô hlăm dŭm klei kƀĭn lu tĭng, tŭ ư mtrŭt mjhar dŭm knơ̆ng bruă Alemăng duh bi liê kơ Việt Nam, boh nik hlăm dŭm mta bruă Alemang mâo klei găl msĕ si pui kmlă, êlan êdeh treng, kdrăp yua bruă mdrao mgŭn, êa drao gŭn, bruă mkŏ mkra. Dua čô khua gĭt gai tŭ ư mtrŭt mđĭ bruă mtô mjuăt bi hriăm, mđĭ kyar ai dưi mă bruă hnơ̆ng tŭ jăk, mđĭ hĭn bruă mkŏ mjing dŭm hdră bi mguôp hlăm klei mtô mă bruă.