Khua knŭk kna Phạm Minh Chính hưn hŏng Khua mil čhil Katalin Novak kơ boh tŭ yuôm bhăn dua tĭng mâo leh hlăm klei bi trông plah wah dua Khua knŭk kna, mâo dŭm hdră tă prŏng kñăm mđĭ klei bi hgŭm knhuah gru leh anăn ƀĭng hgŭm kluôm plah wah Việt Nam leh anăn Hungary hlăm djăp mta bruă.

Kơ bruă kđi čar - bruă hŏng tač êngao, Khua knŭk kna Phạm Minh Chính mtă kơ dua tĭng lŏ dơ̆ng bi tuôm leh anăn bi trông dŭm gưl, boh nik gưl dlông, ăt msĕ mơh dŭm Phŭn, dhar bruă, alŭ wăl kñăm mđĭ klei đăo knang kđi čar leh anăn bi thâo săng, mjing tur knơ̆ng čiăng mđĭ leh anăn pŏk mlar klei bi hgŭm dua nah hlăm djăp mta bruă. Kơ klei bi hgŭm hlăm klei bi kƀĭn lu ala čar, Khua knŭk kna Phạm Minh Chính leh anăn Khua mil čhil Katalin Novak bi tŭ ư lŏ dơ̆ng mđĭ klei bi trông hlăm klei bi kƀĭn lu tĭng, bi hgŭm kjăp, bi hdơ̆ng nao ai hlăm dŭm êpul bruă lu ala čar, boh nik Êpul hgŭm lu ala čar, ASE, klei bhiăn ASEAN-EU kñăm đru mguôp kơ klei êđăp ênang, hơĭt kjăp, bi hgŭm leh anăn mđĭ kyar ti krĭng wăl leh anăn dlông rŏng lăn./.