Anăn, jing Khua knŭk kna Campuchia, Khua knŭk kna Slovakia, Khua gĭt gai êpul gơ̆ng kriê Dlăng êpul hgŭm tar rŏng lăn kơ vaccine leh anăn klei tlŏ mgang, Khua kiă kriê Êpul bruă klei dưi kiă kriê mnơ̆ng dhơ̆ng tar rŏng lăn, Khua kiă kriê Êpul bruă mdrao mgŭn tar rŏng lăn, Khua kiă kriê Êpul bruă mnuih mă bruă tar rŏng lăn…

Hlăm klei bi tuôm hŏng Khua knŭk kna Campuchia Hun Manet, Dua čô Khua knŭk kna hmăng hmưi dưi mkŏ êlan klông plah wah dua lăn čar dưi mđĭ hĭn, hlăm anăn mâo mkŏ êlan dơ̆ng pral, boh nik jing mkŏ Phnôm Pênh hŏng ƀuôn prŏng Hồ Chí Minh, bi mguôp hŏng Lào mtrŭt mđĭ dŭm hdră hiu čhưn ênguê “Sa hdră truh tlâo anôk”. Khua phŭn bruă dhar kreh mơ̆ng 3 lăn čar Campuchia, Lào, Việt Nam srăng bi tuôm leh anăn bi trông kơ hdră êlan bi mguôp dhar kreh bruă hiu čhưn ênguê. Dua tĭng ăt tŭ ư hlăm bruă mgaih msir dŭm alŭ wăl hlăm 16% êlan knông lăn ka kpơ̆ng gơ̆ng knông lăn srăng lŏ dưi mtrŭt mđĭ.