Mơak dưi bi tuôm hŏng mnuih ƀuôn sang hlăm gưl nao čhưn kơ ala čar Russia, Khua knŭk kna brei thâo khădah tuôm hriê truh kơ Russia lu blư̆ leh, ƀiădah klei bi tuôm, blŭ hrăm hŏng mnuih ƀuôn sang pô jing mgei ai tiê kyua klei khăp mnuih ƀuôn sang pô dôk hdĭp ti ala čar Russia , mâo sa klei thâo bi mguôp kjăp, thâo gĭr duh ƀơ̆ng, tŭ jing leh lu hlăm lăn čar anei.

  Khua knŭk kna čang hmăng mnuih Việt Nam ti Russia mâo nanao klei thâo bi mguôp, hơĭt hlăm klei hdĭp, mâo bruă kjăp hlăm yang ƀuôn anôk hdĭp mda. Mjing kdrông mkŏ klei bi mguôp plah wah dua ala čar; čang hmăng lŏ dơ̆ng sa ai hlue gưt jăk klei bhiăn lăn čar anăn, ksiêm hriăm, mă bruă kriăng mđĭ nanao klei thâo săng, klei thâo mă bruă, kreh knhâo, tui hriăm klei knhâo mơ̆ng mah jiăng, tui duah êlan duh bi liê kơ lăn čar pô. Khua knŭk kna hmăng hmưi kơ anôk bruă bi ala knŭk kna Việt Nam ti ngă jăk hĭn bruă bi đru răng kriê hdơ̆ng găp, duh mĭn kơ klei hdĭp mnuih ƀuôn sang pô ti ala čar tue./.