VOV4.Êđê- Hlăm jar Klei bi kƀĭn gưl dlông ASEAN- Mi ti ƀuôn prŏng phŭn Washington DC, Mi, mmăt hruê 12/5, Khua knŭk kna Phạm Minh Chính mâo leh klei bi tuôm hŏng Khua mil čhil Mi Joe Biden ti Sang Kô̆. Hlăm klei bi tuôm, Khua knŭk kna Phạm Minh Chính leh anăn Khua mil čhil Joe Biden bi trông leh kơ klei bi hgŭm dua nah Việt nam - Mi kơ dŭm bruă krĭng wăl, dlông rŏng lăn.

Khua knŭk kna Phạm Minh Chính bi mni kơ klei bi hgŭm Việt Nam- Mi jing klei bi hgŭm mdê hjăn. Dua ala čar găn leh klei ênguôt hnĭng leh êgao mơ̆ng klei blah ngă, hrăm mbĭt bi hgŭm, mđĭ klei bi hgŭm kluôm đĭ kyar ƀrư̆ klă sĭt, tŭ dưn hlăm djăp mta bruă. Việt Nam čang hmăng Mi lŏ dơ̆ng đru leh anăn bi hgŭm hŏng Việt Nam hlăm dŭm mta bruă Mi mâo klei găl leh anăn Việt Nam mâo klei dưi leh anăn klei čiăng msĕ si gang mkhư̆ klei ruă tưp, bi mlih mrô, bi lu jơr hdră mkăp, mdrơ̆ng hŏng klei bi mlih yan adiê, bi hriăm phung mă bruă./.

                                               Pô mblang: H’Zawut Ƀuôn Yă