VOV4.Êđê - Mmăt mbruê, ti Hà Nội, Khua knŭk kna Phạm Minh Chính nao leh hlăm hdră mđung rup klă anăp “Klei hmăng hmưi hŏng êa ksĭ mtah” ƀri wưng hruê “Êa ksĭ tar rŏng lăn” mơ̆ng Êpul hgŭm lu ala čar, hruê kăm Êa ksĭ mơ̆ng Việt Nam .

Khua knŭk kna Phạm Minh Chính mñă klă, jing sa ala čar êa ksĭ tŭ klei hmăi kjham mơ̆ng klei mlih yan adiê leh anăn êa ksĭ đĭ. Việt Nam dưi leh anăn dôk bi êdah klei gĭr ktưn ktang mbĭt hŏng êpul êya tar rŏng lăn mđing truh kơ êa ksĭ mtah, boh lăn mtah, êđăp ênang, hơĭt kjăp leh anăn hrăm mbĭt đĭ kyar, mdrŏng sah, gĭr ktưn ngă bruă, bi mpŭ leh anăn hluê ngă djŏ klei bhiăn tar rŏng lăn, čŏng nao hgŭm hlăm dŭm hdră 2 tĭng leh anăn lu tĭng, hur har mtrŭt mđĭ dŭm klei bi mguôp hlăm alŭ wăl, hlăm tar rŏng lăn kơ bruă êa ksĭ. Ƀri wưng anei, Khua knŭk kna hmăng hmưi lŏ mâo klei bi mguôp, bi đru mâo boh tŭ dưn kơ êa ksĭ mơ̆ng dŭm êpul êya tar rŏng lăn, leh anăn phung ƀĭng hgŭm đĭ kyar.

Y-Ƀel pô mblang