VOV4.Êđê- Hruê mbruê, ti anôk bruă knŭk kna, Khua knŭk kna Phạm Minh Chính mâo leh klei blŭ hrăm êlan đĭng blŭ hŏng Khua knŭk kna Dhŭng Korea Han Duck soo. Hlăm klei blŭ hrăm, 2 čô Khua knŭk kna bi tŭ ư dŭm hdră êlan čiăng mtrŭt mđĭ klei mjĕ giăm 2 ala čar hlăm wưng kơ anăp, lŏ dơ̆ng bi mguôp mkŏ mjing tŭ dưn dŭm bruă bi hdơr 30 thŭn hruê mkŏ mjing klei mjĕ giăm ti thŭn 2022, hluê ngă mâo boh tŭ dưn dŭm hdră bi mguôp 2 tĭng leh anăn lu tĭng, mtrŭt mjhar dŭm knơ̆ng bruă Dhŭng Korea pŏk phai klei duh bi liê kơ Việt Nam.

Bi trông kơ boh klei êa ksĭ Ngŏ, 2 tĭng bi êdah hdră tă mbĭt kơ bruă rơ̆ng klei êđăp ênang, klei êngiê bruă dŭ mdiăng ti krĭng ksĭ Ngŏ, mgaih msir klei amâo thâo bi djŏ hŏng hdră êđăp ênang, rơ̆ng klei tŭ kơ dŭm ala čar djŏ hŏng klei bhiăn tar rŏng lăn, hlăm anăn mâo klei kuôl kă Êpul hgŭm lu ala čar kơ klei bhiăn êa ksĭ (UNCLOS) 1982.

Pô mblang: Y-Ƀel Êban