VOV4.Êđê - Tlam mmăt mbruê, Khua knŭk kna Phạm Minh Chính mâo leh klei blŭ hrăm êlan đĭng blŭ hŏng Albert Bourla, khua gĭt gai hlŏng ngă khua kiă kriê êpul grŭp Pfizer. Hlăm klei blŭ hrăm anăn, Khua knŭk kna Phạm Minh Chính mâo klei lač jăk, yap yuôm bhăn êpul grŭp Pfizer leh anăn wăt kơ Albert Bourla hlăm hruê mmông êgao bi mguôp mâo boh tŭ dưn hŏng dŭm anôk bruă ti Việt Nam čiăng bi leh bruă mkăp brei hnưm 51 êklăk hnơ̆ng vaccine gang mkhư̆ klei ruă tưp Covid-19 kơ Việt Nam hluê si klei mñă mơ̆ng Việt Nam hlăm klei blŭ hrăm hŏng Khua knŭk kna hlăk hruê 20/08/2021.

Khua knŭk kna Phạm Minh Chính brei thâo, mrâo êgao Việt Nam tŭ mă leh vaccine mơ̆ng Pfizer tlŏ kơ hđeh mơ̆ng 12-17 thŭn, truh kơ ară anei, tlŏ mgang aruăt tal 1 mâo giăm 96%, aruăt tal 2 mâo giăm 90% leh anăn anei jing klei gĭr ktưn prŏng êdi. Bruă anei đru kơ phung hđeh mâo klei hơĭt leh anăn êđăp ênang êjai lŏ wĭt nao sang hră mơar. Ti anăp klei ruă tưp ăt dôk dleh dưi ksiêm dlăng, kñăm răng mgang klei suaih pral kơ phung hđeh leh anăn lŏ dơ̆ng pŏk ƀăng sang hră hŏng klei êđăp ênang, Khua knŭk kna mñă kơ khua gĭt gai, khua kiă kriê êpul grŭp Pfizer lŏ uêñ mĭn, mtrŭt bi hmar bruă mkăp brei hnưm 22 êklăk hnơ̆ng vaccine kơ phung hđeh mơ̆ng 5 truh kơ 12 thŭn ti Việt Nam hlăm dŭm hruê kơ anăp mtam.

Y-Bel pô mblang