VOV4.Êđê - Tlam mbruê 19/9, Khua knŭk kna Phạm Minh Chính mâo leh klei blŭ hrăm hŏng Khua knŭk kna China Lý Khắc Cường. Dua čô Khua knŭk kna bi klă klei yuôm bhăn hlăm klei mjĕ giăm Việt Nam – China hŏng grăp ala čar, yap yuôm bhăn dŭm boh tŭ dưn hlăm klei mjĕ giăm 2 tĭng hlăm hruê mmông êgao. Bi mguôp klei mnia mblei rơ̆ng klei đĭ kyar, klei dleh kpăk ti dŭm ƀăng jang knông lăn dưi mgaih msir.

Klei duh bi liê mơ̆ng China kơ Việt Nam lŏ dơ̆ng đĭ. Bi mguôp hlăm bruă gang mkhư̆ klei ruă tưp mâo boh tŭ dưn. Bi kơ klei bi mguôp hlăm wưng kơ anăp, 2 čô Khua knŭk kna bi tŭ ư mđĭ hĭn klei bi tuôm gưl dlông leh anăn dŭm gưl, mtrŭt mđĭ dŭm klei bi mguôp êlam hĭn, đĭ kyar hĭn, kjăp hĭn, mtrŭt mđĭ klei mjĕ êrô mnuih ƀuôn sang 2 ala čar. Khua knŭk kna Phạm Minh Chính mñă kơ 2 tĭng lŏ bi mguôp čiăng ba klei mnia mblei đĭ kyar hơĭt, mñă kơ China mkŏ mjing klei găl kơ Việt Nam hlăm bruă ba čhĭ mnơ̆ng dhơ̆ng, boh nik bi hmar bruă pŏk anôk mnia mblei boh mnga bruă lŏ hma mơ̆ng Việt Nam, krŭ wĭt kluôm ênŭm klei ngă bruă ti dŭm ƀăng jang knông lăn, bi mguôp hluê ngă leh anăn dưn yua jih hnơ̆ng klei găl mâo mơ̆ng dŭm klei kuôl kă mnia mblei êngiê lu tĭng.

Y-Ƀel pô mblang