VOV4.Êđê - Mmăt hruê 27/2, Khua Knŭk kna Phạm Minh Chính nao leh anăn blŭ hrăm hlăm Hdră bi hdơr Hruê phung nai Việt Nam 27/2 “Lĭng kahan ao kô̆”. Khua knŭk kna Phạm Minh Chính bi ala akơ Đảng, Knŭk kna mơĭt asăp hơêč hmưi, bi mni kơ phung aê mdrao, phung mă bruă hlăm kluôm ala, phung lŏ dơ̆ng yap bruă yuôm bhăn mơ̆ng bruă mdrao mgŭn; boh nik leh jih djuê ana hgao klei dleh dlan, gĭr, bi hgŭm mdrơ̆ng hŏng klei ruă Covid-19.

Khua Knŭk kna mñă klă, Khua gĭt gai Đảng, Knŭk kna, dŭm êpul bruă Đảng leh anăn bruă sang čư̆ êa dŭm gưl, hŏng jih jang mnuih ƀuôn sang bi mni, thâo săng leh anăn bi đru klei dleh dlan, suăi êmăn, săn asei mơ̆ng bruă mdrao mgŭn, aê mdrao leh anăn phung ngă bruă mdrao mgŭn. Khua Knŭk kna mtă kơ dŭm gưl, dhar bruă, dŭm alŭ wăl leh anăn iêô mthưr mnuih ƀuôn sang kluôm ala lŏ dơ̆ng kƀĭn jih ai tiê kơ Hdră tlŏ mgang, hlăm anăn mđĭ ktang bruă tlŏ vaccin kơ hđeh rơ̆ng êđăp ênang, tŭ dưn čiăng răng mgang klei suaih pral kơ phung hđeh leh anăn đru kơ phung hđeh lŏ wĭt nao sang hră êđăp ênang.

H’Zawut pô mblang