Tlam mbruê 21/10, Khua Knŭk kna Phạm Minh Chính blŭ hrăm êlan đĭng blŭ hŏng Khua Knŭk kna Anutin Charnvirakul. Dua čô khua gĭt gai hơ̆k mơak ti anăp bruă dua ala čar mđĭ hnơ̆ng klei mjĕ giăm bi mguôp kluôm dhuôm hlăm mlan 5/2025, bi klă klei bi mguôp Việt Nam - Thailand dôk đĭ kyar ktang, tŭ dưn hlăm lu mta bruă.

Khua Knŭk kna Phạm Minh Chính mñă klă Việt Nam srăng lŏ dơ̆ng mkŏ mjing klei găl kơ knơ̆ng bruă Thailand duh bi liê, mnia mblei ti Việt Nam.

Mbĭt anăn hmăng hmưi dua tĭng mtrŭt mđĭ klei bi mguôp bruă êlan klông, klei êđăp ênang, dhar kreh, sang hră mơar leh anăn mjĕ mjuk mnuih ƀuôn sang. Khua Knŭk kna Thailand tŭ ư, mñă ktang klei čiăng êdi  bi mguôp kjăp čiăng ba klei mnia mblei dua tĭng mâo 25 êklai USD grăp thŭn, mbĭt anăn hmăng hmưi mâo thiăm knơ̆ng bruă Việt Nam duh bi liê kơ Thailand hlăm bruă tuh tia, bruă lŏ hma leh anăn kdrăp mrâo mrang.