Aguah mbruê 29/11, hluê mmông alŭ wăl, knăm tŭ drông klă klơ̆ng Khua knŭk kna Phạm Minh Chính dưi mkŏ mjing kdrưh kơăm ti sang bruă Khua mil čhil Turki mơ̆ng k’iăng Khua mil čhil Turki Cevdet Zilmaz gĭt gai. Leh kơnăn mtam, Khua knŭk kna Phạm Minh Chính mâo klei blŭ hrăm hŏng k’iăng Khua mil čhil Turki Cevdet Zilmaz.

Hlăm klei blŭ hrăm, dua tĭng bi hâo hưn kơ boh sĭt bruă duh mkra, bruă kđĭ čar – yang ƀuôn hlăm grăp lăn čar leh anăn bi trông kơ dŭm boh klei tar rŏng lăn, alŭ wăl dôk bi mđing. Dua čô khua gĭt gai mñă klă klei hmăng hmưi leh anăn gĭr mtrŭt mđĭ klei mjĕ giăm leh anăn bi mguôp lu mta bruă Việt Nam – Turki kyua boh tŭ dưn mbĭt 2 ala čar, kyua klei êđăp ênang, hơĭt kjăp leh anăn mđĭ kyar ti dua alŭ wăl leh anăn tar rŏng lăn. Dua čô khua gĭt gai tŭ ư srăng lŏ dơ̆ng bi kjăp leh anăn mtrŭt mđĭ hĭn klei mjĕ giăm bruă kđi čar – bruă hŏng tač êngao hŏng bruă mđĭ hĭn klei bi trông êpul dŭm gưl, boh nik jing êpul gưl dlông.