VOV4.Êđê- Tlam hruê 23/1, ti čar Vĩnh Long, Khua knŭk kna Phạm Minh Chính lehanăn Khua hlăm Anôk bruă Đảng Võ Văn Thưởng nao čuh brui mngưi, ba dưm kwang mnga bi anôk bi hdơr kơ Khua kiă kriê Êpul hgŭm phung khua phŭn bruă Phạm Hùng lehanăn anôk bi hdơr kơ Khua knŭk kna Võ Văn Kiệt. Khua knŭk kna mbĭt hŏng êpul mă bruă nao dưm leh mnga, čuh brui mngưi, pioh sa mnĭt lŏbi hdơr klei đru mguôp prŏng mơ̆ng Khua kiă kriê Êpul hgŭm phung khua phŭn bruă Phạm Hùng lehanăn anôk bi hdơr kơ Khua knŭk kna Võ Văn Kiệt – dua čô anak êdah êdi mơ̆ng ƀuôn sang Vĩnh Long mâo leh lu klei đru mguôp, săn asei kơ hdră kdơ̆ng mblah mtlaih êngiê djuê ana, mkŏ mkra lehanăn răng mgang ala čar. Ƀri gưl anei, Khua knŭk kna mbĭt hŏng êpul mă bruă nao čhưn lehanăn h’êč hmưi Têt kơ mnuih mă bruă ti wăl tuh tia mkra mjing Hòa Phú, kdriêkLong Hồ, čar Vĩnh Long; h’êč hmưi Têt, mđup brei mnơ̆ng kơ gŏ sang knŭk kna dlăng ba, gŏ sang ƀun, gŏ sang hmăi djŏ mơ̆ng klei ruă Covid 19 lehanăn ba jao 100 boh sang mđup brei kơ gŏ sang dleh dlan mơ̆ng kdriêk Vũng Liêm lehanăn kdriêk Tam Bình./.

Pô mblang: H’Nêč Êñuôl