VOV4.Êđê - Tlam hruê 10/3, Khua knŭk kna Phạm Minh Chính drông leh aduôn Deborah Paul, Pô bi ala Canada hriê kkuh bi ktlah. Ti knăm anei, Khua knŭk kna Phạm Minh Chính bi mni kơ Pô bi ala ruê̆ leh wưng păn bruă jăk siam ti Việt Nam, bi mni klei đru mguôp mơ̆ng Pô bi ala ba leh klei bi mjĕ kluôm dhuôm Việt Nam – Canada ƀrư̆ hruê ƀrư̆ đĭ kyar kluôm dhuôm, klă sĭt hlăm djăp mta bruă. Thŭn 2021, ênoh prăk bi mnia mblei dua nah mâo êbeh 6 êklai USD, đĭ 19% mkă hŏng thŭn 2020. Khua knŭk kna lač jăk kơ Knŭk kna lehanăn mnuih ƀuôn sang Canada đru leh vaccine kơ Việt Nam hluê hdră COVAX, đru kơ Việt Nam hdĭp êđăp ênang, ksiêm dlăng tŭ dưn klei ruă, lŏ pŏk ƀăng, krŭ wĭt lehanăn mđĭ kyar bruă duh mkra – ala ƀuôn. Khua knŭk kna mtă kơ dua ala čar lŏ mtrŭt mđĭ klei bi hgŭm hlăm djăp mta bruă, hlăm anăn mâo bruă duh mkra – mnia mblei – duh bi liê, mdrơ̆ng hŏng klei ruă tưp lehanăn klei bi mlih yan adiê, đĭ kyar mtah, h’ĭt kjăp, mjuăt bi hriăm mnuih mă bruă mâo klei thâo.../.

H’Nêč pô mblang