VOV4.Êđê- Hrue mbrue (11/5), ƀri nao ti anôk bi kƀĭn gưl dlông ASEAN – Mi, nao čuă lehanăn mă bruă ti ala čar Mi lehanăn ti anôk bruă Êpul hgŭm lu ala čar, hlăm ƀuôn prŏng phŭn Washington DC, ala čar Mi, Khua knŭk kna Phạm Minh Chính drông čhưn leh hŏng khua Phŭn bruă ngăn prăk Mi Janet Yellen.

Ti anôk bi tuôm anei, Khua knŭk kna bi myuôm tui si atur kjăp klei bi mguôp kluôm dhuôm Việt Nam – Mi, klei hgŭm plah wah dua ala čar kơ bruă duh mkra mnia mblei, lehanăn klei kơ ngăn prăk wưng leh êgao, lehanăn klei bi hgŭm kjăp hŏng Việt Nam kơ bruă mđĭ kyar duh mkra, mghaih msir djăp mta klei lông dlăng tar rŏng lăn, hlăm anăn mâo wăt bruă bi mlih bruă pui kmlă, lehanăn hlue ngă klei ƀuăn ti COP 26, klei hgŭm mkŏ mjing hdră êlan duh mkra alŭ wăl, bi kjăp bruă duh mkra mnia mblei, lehanăn bruă mkăp djăp mta mnơ̆ng dhơ̆ng. Khua knŭk kna čang hmăng kơ Mi lŏ đru kah mbha hdră êlan klei kơ ngăn prăk, boh nik hlăm bruă chứng khoán, klei kơ sang lăn hŏng klei klă mngač, êđăp ênang, đru bi hơĭt bruă duh mkra kluôm./.

Pô mblang: Y-Khem Niê