VOV4.Êđê -  Tlam 15/6, Khua knŭk kna Phạm Minh Chính drông Khua bi ala Êjip ti Việt Nam nao kkuh drông. Ti mmông drông, Khua knŭk kna bi mklă Việt Nam dlăng yuôm nanao knhuah gru bi hgŭm plah wah dua ala čar Việt Nam - Êjip.

Khua knŭk kna mtă kơ dua tĭng bi hgŭm tliêr kjăp čiăng ba klei bi hgŭm lu mta plah wah dua ala čar êlam hĭn, klă sĭt hĭn leh anăn tŭ dưn hĭn mơ̆ng dŭm hdră msĕ si: Mđĭ ktang klei bi trông êpul hlăm dŭm mta bruă kđi čar, bruă duh mkra. Khua knŭk kna mtă kơ dua tĭng mđĭ klei bi hgŭm hlăm bruă kluôm rŏng lăn leh anăn hlăm klei bi kƀĭn lu tĭng; nao ai hŏng klei bi kƀĭn mơ̆ng ASEAN leh anăn Việt Nam kơ klei Êa ksĭ Ngŏ, mđĭ klei bi hgŭm êđăp ênang - lĭng kahan leh anăn bi hgŭm hlăm êpul răng mgang klei êđăp ênang mơ̆ng Êpul hgŭm lu ala čar, mơ̆ng tur knơ̆ng mpŭ kơ klei dưi leh anăn klei tŭ djŏ hdră bhiăn, djŏ klă mơ̆ng dŭm ala čar, đru mguôp hlăm klei êđăp ênang, hơĭt kjăp leh anăn đĭ kyar hlăm krĭng wăl leh anăn dlông rŏng lăn./.

H’ Zawut pô mblang