VOV4.Êđê- Tlam hruê 31/3, ti Anôk bruă knŭk kna, Khua knŭk kna Phạm Minh Chính drông leh Khua bi ala Thái Lan ti Việt Nam Nikorndej Balankura nao kkuh čhưn. Hlăm mmông drông, Khua knŭk kna Phạm Minh Chính bi mni kơ klei bi hgŭm Việt Nam - Thái Lan hlăm wưng êgao mđĭ kyar jăk siam, êlam hĭn hlăm jih bruă. Khua knŭk kna mñă klă dua ala čar brei lŏ dơ̆ng mđĭ ktang hĭn klei bi hgŭm năng đaŏ năng, hlăm anăn mâo bruă pŏk ngă tŭ dưn klei bi trông, bi tuôm gưl dlông leh anăn dŭm gưl, dŭm klei bhiăn bi hgŭm dua nah, boh nik klei bhiăn bi kƀĭn Knŭk kna mbĭt plah wah dua Knŭk kna leh anăn Knơ̆ng bruă bi hgŭm dua nah. Khua knŭk kna mtă kơ dua tĭng mđĭ pral bi trông kơ bruă tŭ yap hră tlŏ leh vaccin mơ̆ng dua nah; pŏk wĭt dŭm gưl phiơr mnia blei msĕ yang đar, mjing klei găl hiu čhưn ênguê, mnia blei plah wah dua ala čar, bi mklă Việt Nam srăng lŏ dơ̆ng bi hgŭm tliêr kjăp hŏng Thái Lan kñăm rơ̆ng tŭ jing mơ̆ng thŭn APEC Thái Lan 2022.

Pô mblang: H’Zawut Ƀuôn Yă