Hâo hưn hŏng Khua bruă kƀĭn ala Bulgaria kơ tur knơ̆ng mkŏ mjing ala čar, hdră êlan hŏng tač êngao, lĭng kahan, ăt msĕ mơh boh tŭ mđĭ kyar bruă duh mkra ala ƀuôn mơ̆ng Việt Nam, Khua knŭk kna  Phạm Minh Chính mtă, brei dua tĭng mđĭ klei bi hgŭm leh anăn čang hmăng mâo lu hĭn dŭm anôk bruă duh mkra, phung bi liê mơ̆ng Việt Nam leh anăn Bulgaria bi liê hlăm grăp ala čar.

Khua knŭk kna Phạm Minh Chính mtă kơ dua tĭng bi mklă klei bi hgŭm bruă duh mkra jing phŭn hlăm bi hgŭm dua ala čar, brei mđĭ bruă mnia blei dua nah čiăng hnưm mâo 500 êklăk USD/thŭn. Ƀri gưl anei, Khua knŭk kna Phạm Minh Chính mni lač jăk kơ Bulgaria đru leh dŭm êbâo čô knuă druh, phung hriăm gưl prŏng Việt Nam, hlăm anăn mâo lu khua gĭt gai gưl dlông Việt Nam, mtă kơ dua tĭng ksiêm hriăm klei găl bi hgŭm mtô bi hriăm mrâo kñăm iêô jak phung hriăm gưl prŏng ti dŭm sang hră grăp ala čar mâo klei găl./.