VOV4.Êđê- Ƀri nao ti Klei bi kƀĭn gưl dlông ASEAN – Mi, nao čhưn lehanăn mă bruă ti Mi lehanăn Êpul hgŭm lu ala čar, hruê 12/5, Khua knŭk kna Phạm Minh Chính bi tuôm leh hŏng Scott A. Nathan - Khua dhar bruă ngăn prăk mđĭ kyar Mi (DFC). Khua knŭk kna akâo kơ DFC lŏ dơ̆ng đru kơ Việt Nam hlăm dŭm mta bruă msĕ si bruă pui kmlă lŏ mkra mjing, mdrơ̆ng hŏng klei bi mlih yan adiê, bi mlih mrô; msir mghaih klei truh mơ̆ng klei mblah ngă.

Khua knŭk kna ăt akâo čiăng mtrŭt mđĭ hdră bi hgŭm h’ĭt kjăp krĭng krông Mekong hlăk boh klei êa ksĭ dôk đĭ, mkra mđĭ klei hdĭp mnơ̆ng dhơ̆ng lehanăn ai tiê klei mĭn mnuih ƀuôn sang hlăm krĭng wăl. Bi mni klei găl mâo, klei čang hmăng hgŭm bruă duh mkra hŏng Việt Nam, Scott A.Nathan brei thâo, lu hdră bi hgŭm plah wah dua tĭng dưi pŏk ngă tŭ dưn. Hlăm wưng ti anăp, DFC čang hmăng dưi mtrŭt mđĭ hdră bi hgŭm hlăm bruă mdrơ̆ng hŏng klei bi mlih yan adiê, bruă pui kmlă lŏ mkra mjing, mđĭ kyar krĭng krông Mekông./.

                                                    Pô mblang: H’Nêč Êñuôl