Hlăm mmông tŭ drông, Khua Knŭk kna mñă ktang, klei bi hgŭm plah wah Việt Nam leh anăn Russia, plah wah Đảng cộng sản Việt Nam leh anăn Đảng cộng sản Russia ƀrư̆ hruê ƀrư̆ hơĭt kjăp. Khua Knŭk kna Phạm Minh Chính lač, hlăm wưng dua ala čar čiăng bi mguôp, mkŏ mjing ai ktang, bi trông mđĭ hĭn klei đăo knang leh anăn bi thâo săng hdơ̆ng pô, mđing hmư̆ hŏng jih ai tiê, kah mbha jih hnơ̆ng leh anăn hŏng bruă klă klơ̆ng.

Bi kah mbha kơ wưng kơ anăp, Việt Nam mdưm mta kñăm đĭ kyar 2 ênoh mrô, Khua Knŭk kna lač, Việt Nam bi klă ai dưi mơ̆ng lam jing anak mnuih, čư̆ dliê kmrơ̆ng, dhar kreh jing yuôm bhăn, hdră êlan, klei bi klă, ai dưi mơ̆ng êngao jing kdrăp mrâo mrang, pui kmlă, klei kiă kriê mâo knhuah kdlưn hĭn. Bi hŏng ai dưi mơ̆ng nah êngao, Khua Knŭk kna mñă ktang Việt Nam amâodưi kƀah ôh klei đru mơ̆ng Russia, boh nik jing bruă pui kmlă, êa pui êwa čuh, dŭm boh klei djŏ tuôm hŏng klei êđăp ênang, dhar kreh.