Khua knŭk kna Phạm Minh Chính bi mklă, Việt Nam jing ala čar hgŭm mâo bruă klam  hlăm klei hlue ngă klei kuôk kă dlông rŏng lăn leh anăn klei kuôl kă lu ala čar kơ êa ksĭ. Knŭk kna Việt Nam čang hmăng IMO lŏ dơ̆ng jing êpul bruă lu ala čar ba anăp, mđĭ klei bi hgŭm plah wah Việt Nam leh anăn ala čar hgŭm hlăm bruă bi hgŭm hlăm êa ksĭ. Việt Nam mâo êbeh 3000km hang ksĭ, ti ktuê hang ksĭ dlông rŏng lăn mkŏ duang êa ksĭ prŏng hĭn jing Pacific leh anăn krĭng ksĭ India, krĭng mâo bruă duh mkra đĭ kyar pral leh anăn hnơ̆ng đĭ kyar ktang.

Việt Nam dlăng mđĭ kyar bruă duh mkra êa ksĭ jing sa hlăm dŭm hdra wkñăm mrô sa hlăm hdră mđĭ kyar lăn čar, ară anei mâo 34 kdrŭn ksĭ dôk ngă bruă. Čiăng mđĭ hĭn klei bi hgŭm hlăm bruă êa ksĭ, Khua knŭk kna mtă IMO leh anăn  Khua gĭt gai lŏ dơ̆ng nao ai leh anăn đru kơ Việt Nam mđĭ klei thâo kơ mnơ̆ng dhơ̆ng, đru klă sĭt kơ klei mđĭ kyar bruă duh mkra- ala ƀuôn kơ Việt Nam leh amăm mđĭ klei êđăp ênang, kjăp, bi hgŭm, mđĭ kyar dlông rŏng lăn./.