VOV4.Êđê - Tlam hruê 26/5, ti anôk bruă knŭk kna, Khua knŭk kna Phạm Minh Chính drông leh Nai prŏng Stewart Cole, Khua knơ̆ng bruă Pasteur Paris dôk mâo gưl čhưn, mă bruă ti Việt Nam. Ti knăm anei, Khua knŭk kna mñă: Bruă mdrao mgŭn jing bruă bi hgŭm mtô mblang jăk siam, sa hlăm dŭm gru mngač đru mtrŭt mđĭ hĭn klei bi mjĕ ƀĭng hgŭm phŭn Việt Nam lehanăn Prăng ƀrư̆ hruê ƀrư̆ đĭ kyar.

Khua knŭk kna mñă klă, klei bi mjĕ hgŭm bruă hƀuê ênuk plah wah Knơ̆ng bruă Pasteur Prăng lehanăn dŭm knơ̆ng bruă Pasteur ti Việt Nam dưi dlăng jing sa klei bi êdah lehanăn ăt jing mta phŭn hlăm hdră bi hgŭm bruă mdrao mgŭn plah wah dua ala čar. Khua knŭk kna lač jăk kơ knơ̆ng bruă Pasteur mâo leh klei đru yuôm bhăn kơ dŭm Knơ̆ng bruă Pasteur mơ̆ng Việt Nam dăl hlăm wưng êgao, boh nik jing ênoh đru kñăm mđĭ hĭn klei thâo ksiêm dlăng lehanăn bi mklă kman SARS-Cov-2 hŏng ênoh prăk êbeh 10 êklai prăk./.

H’Nêč pô mblang