VOV4.Êđê- Tlam hruê 31/5, ti Anôk bruă Knŭk kna, Khua knŭk kna Phạm Minh Chính drông leh Pascal Soriot, khua knơ̆ng êpul group AstraZeneca ƀri gưl hriê čhưn lehanăn mă bruă ti Việt Nam hluê asăp jak iêu mơ̆ng khua knŭk kna. Ti knăm anei, Khua knŭk kna Phạm Minh Chính bi mni bruă klam lehanăn klei đru mguôp mơ̆ng êpul group AstraZeneca hlăm klei gĭr mdrơ̆ng hŏng klei ruă Covid 19 hlăm tar rŏng lăn lehanăn ti Việt Nam. Khua knŭk kna lač jăk kơ hdră bi hgŭm kjăp lehanăn tŭ dưn mơ̆ng AstraZeneca hŏng Việt Nam hlăm wưng êgao, boh nik lač jăk kơ Pascal Soriot mđing dlăng, gĭt gai leh êpul group AstraZeneca mkăp hnưm giăm 30 êklăk vaccine gang mkhư̆ Covid 19 kơ Việt Nam hlăm thŭn 2021. Bi mni kơ klei bi mklă pŏk mlar hdră duh bi liê hgŭm bruă mkra mjing êa drao mâo ênoh 90 êklăk USD ti Việt Nam, Khua knŭk kna bi êdah klei m’ak kơ klei Phŭn bruă mdrao mgŭn lehanăn Anôk bruă AstraZeneca Việt Nam dôk ngă čiăng mđing truh kơ Hrăm’ar bi hgŭm bruă plah wah dua tĭng. Anei jing tur knơ̆ng čiăng kơ AstraZeneca bi hgŭm hlăm wưng sui ti Việt Nam, bi êdah klei ƀuăn rơ̆ng hrăm mbĭt bi hgŭm hŏng Việt Nam hlăm hdră mđĭ kyar h’ĭt kjăp./.

                                                    Pô mblang: H’Nêč Êñuôl