VOV4.Êđê -  Aguah mbruê, 21/3, ti sang bruă khua lăn čar, Khua knŭk kna Phạm Minh Chính gĭt gai leh knăm tŭ drông Khua knŭk kna Malaysia Dato’ Sri Ismail Sabri bin Yaakob klă klơ̆ng hruê čuă ala čar Việt Nam. Klei hriê čuă anei mơ̆ng Khua knŭk kna Malaysia dưi mkŏ mjing hlăm wưng klei mjĕ giăm knhuah gru leh anăn ƀĭng hgŭm hdră êlan Việt Nam – Malaysia dôk đĭ kyar jăk. 2 ala čar dôk mđĭng truh kơ klei bi hdơr 50 thŭn hruê mkŏ mjing klei jĕ giăm bruă hŏng tač êngao (1973-2023).

Leh knăm tŭ drông, Khua knŭk kna Phạm Minh Chính leh anăn Khua knŭk kna Malaysia mâo leh klei bi blŭ hrăm leh anăn ktuê dlăng klei bi klă dŭm hră mơar yuôm bhăn plah wah 2 ala čar. Klei hriê čuă anei kñăm mđĭ hĭn klei bi mguôp 2 ala čar, mđĭ hĭn ai dưi mơ̆ng 2 ala čar hlăm klei bi mguôp hlăm wưng leh jih klei ruă tưp Covid-19. Mbĭt anăn, anei jing klei găl čiăng kơ 2 ala čar lŏ ksiêm dlăng dŭm mta bruă mrâo hlăm klei bi mguôp 2 nah, bi trông kơ dŭm boh klei hlăm alŭ wăl leh anăn tar rŏng lăn 2 tĭng dôk mđing, mtrŭt mđĭ bruă mnia mblei, duh bi liê plah wah 2 ala čar.

Y-Ƀel pô mblang