Khua knŭk kna Phạm Minh Chính bi mni gưl hriê čhưn tal dua ti Việt Nam mơ̆ng Jose Ramos-Horta jing Khua mil čhil yuôm bhăn snăk, kruăk knăk êlan êbeh 20 thŭn mkŏ mjing klei bi hgŭm, đru mđĭ klei đăo  knang kđi čar leh anăn mjing boh kdrŭt mrâo kơ klei bi hgŭm dua ala čar hlăm wưng kơ anăp.

 Dua khua gĭt gai ăt tŭ ư brei mđĭ hĭn klei đăo knang kđi čar mơ̆ng klei bi trông gưl dlông leh anăn dŭm gưl; pŏk ngă tŭ dưn klei kuôl kă gưl dlông; lŏ dơ̆ng mđĭ bi leh jar hdră bhiăn kơ klei bi hgŭm dua nah; ba yua tŭ dưn klei găl bi hgŭm prŏng prĭn plah wah dua ala čar. Khua knŭk kna mtă kơ dua tĭng hnưm bi kdung amâodah bi siñê Hră bi hdơr mrâo kơ Bruă mnia blei braih, đru rơ̆ng jăp mnơ̆ng ƀơ̆ng huă, mtrŭt Timor-Leste mđĭ blei dŭm mta mnơ̆ng mơ̆ng Việt Nam. Dua tĭng ăt ƀuăn rơ̆ng lŏ dơ̆ng bi nao ai klei mĭn mơ̆ng ASEAN kơ Êa ksĭ Ngŏ ăt msĕ mơh klei gĭr mđĭ lar klei êđăp ênang, hơĭt kjăp leh anăn êngiê, bruă êdeh phiơr ti Êa ksĭ Ngŏ, đru hlăm bruă mđĭ lar klei êđăp ênang, hơĭt kjăp leh anăn mđĭ kyar ti krĭng wăl.