Khua knŭk kna brei thâo, Việt Nam bi myuôm klei bi mjĕ jăk siam hŏng Romania; bi mni kơ Romania đru leh kơ Việt Nam hlăm hdră kdơ̆ng mblah sua wĭt klei êngiê, hluh lir ala čar êlâo adih ăt msĕ mơh hdră mkŏ mkra lehanăn mđĭ kyar ala čar hruê anei.

Khua knŭk kna Phạm Minh Chính lehanăn Khua phŭn bruă Stefan-Radu Oprea m’ak hlăk ƀuh klei bi mjĕ dua nah Việt Nam-Romania dôk đĭ kyar jăk hlăm lu mta bruă: Mâo hdră kđi čar, bruă hŏng tač êngao, duh mkra, răng mgang klei êđăp ênang, lĭng kahan, dhar kreh, mjuăt bi hriăm. Hlăm wưng ti anăp, mbĭt hŏng bruă mđĭ hdră bi trông êpul gưl dlông lehanăn dŭm gưl. Khua knŭk kna Phạm Minh Chính mtă kơ dua tĭng brei bi mklă hdră bi hgŭm bruă duh mkra – duh bi liê – mnia mblei jing tur knơ̆ng yuôm bhăn hlăm klei bi mjĕ dua nah wưng ti anăp, năng hŏng klei bi mjĕ hlăm bruă kđi čar, bruă hŏng tač êngao. Dua tĭng brei mđĭ hdră bi hgŭm bruă êlan klông dŭ mdiăng, hlăm anăn mâo bruă êlan phiơr, ba yua tŭ dưn Klei kuôl kă EVFTA./.