Khua knŭk kna pah mni boh tŭ dưn Klei kƀĭn trông hluê ngă klei kuôl kă hdră êlan bi mguôp Việt Nam – Lào, wưng thŭn 2021 – 2025, bi myuôm bruă klam mơ̆ng Dhar bruă bi mguôp dua ala čar mâo leh klei gĭr, bi mguôp hŏng dŭm anôk bruă djŏ tuôm mơ̆ng dua tĭng hlăm 6 mlan akŏ thŭn 2024 ruh mgaih klei dleh dlan, kpăk gun hlăm dŭm hdră kñăm, mtrŭt mđĭ klei bi mguôp hlăm lu mta bruă.

Khua knŭk kna mñă kơ knŭk kna Lào čiăng bi hơĭt wăl duh mkra mnia mblei, mgaih msir dŭm klei kpăk gun mơ̆ng dŭm knơ̆ng bruă duh bi liê ti Lào, mlih mrâo klei ngă hră mơar knŭk kna, mkŏ mjing klei găl hlăm bruă hluê ngă dŭm hdră mrâo, kñăm kơ dŭm mta bruă msĕ si pui kmlă, mnơ̆ng gŭ lăn, bruă lŏ hma, hiu čhưn ênguê, mtô mjuăt bi hriăm…