VOV4.Êđê - Aguah 17/3, Khua knŭk kna Phạm Minh Chính drông leh Khua phŭn bruă hŏng tač êngao Saudi Arabia Faisal Bin Farhan Al Saud hriê kkuh čhưn.  Khua knŭk kna mtă kơ dua ala čar mđĭ ktang dŭm klei bi trông êpul leh anăn bi tuôm plah wah Khua gĭt gai dua ala čar; mđĭ ktang klei bi hgŭm plah wah Phŭn bruă hŏng tač êngao leh anăn mjĕ êrô mnuih ƀuôn sang, mjĕ êrô dhar kreh plah wah dua ala čar.

Khua knŭk kna mtă kơ Saudi Arabia hnưm lăm lui asăp kăm blei kan hdang mơ̆ng Việt Nam, mđĭ ktang blei dŭm mnơ̆ng dhơ̆ng mơ̆ng lŏ hma Việt Nam, pŏk mlar anôk ba čhĭ hŏng dŭm mta mnơ̆ng dhơ̆ng mdê mdê, kah mbha klei thâo đru kơ Việt Nam dưi ba čhĭ mnơ̆ng dhơ̆ng leh anăn hdră bruă hlue si klei bhiăn Islam Halal, mjing klei găl kơ dŭm anôk bruă duh mkra Việt Nam hlăm bruă hgŭm hlăm hdră bruă mkăp êa pui ti Saudi Arabia leh anăn mâo klei găl bi trông klei hâo hưn, kah mbha klei thâo hŏng dŭm ƀĭng hgŭm Saudi Arabia hlăm dŭm klei msir trô̆ msĭn, êa pui êwa čuh leh anăn tuh tia mkra mjing…

H’Zawut pô mblang