VOV4.Êđê -  Tlam hruê 14/2, ti anôk bruă knŭk kna, Khua knŭk kna Phạm Minh Chính drông leh Alok Kumar Sharma, Khua phŭn bruă knŭk kna Ăngle, Khua kiă kriê klei bi kƀĭn tal 26 mơ̆ng dŭm tĭng nao hlăm Klei kuôl kă mơ̆ng Êpul gơ̆ng mơ̆ng Êpul hgŭm lu ala čar kơ klei bi mlih yan adiê (COP 26) dôk mâo gưl čhưn, mă bruă ti Việt Nam kñăm mtrŭt mđĭ bruă hluê ngă boh tŭ klei bi kƀĭn.

Ti knăm anei, Khua knŭk kna bi mni kơ Khua phŭn bruă knŭk kna Ăngle ruah leh Việt Nam jing sa hlăm dŭm anôk jưh jơ̆ng hlăm gưl hiu čhưn ti krĭng Asi. Klei bi kƀĭn pŏk sa wưng mrâo hlăm klei gĭr mơ̆ng tar rŏng lăn kñăm mdrơ̆ng hŏng klei bi mlih yan adiê, hŏng klei sa ai mơ̆ng lu ala čar bi hrăm mbĭt ngă bruă. Alok Kumar Sharma bi mni kơ klei bi mlih prŏng ti Việt Nam leh gưl čhưn hlăk mlan 5/2021, h’êč hmưi kơ dŭm boh tŭ mơ̆ng Việt Nam hlăm hdră gang mkhư̆ klei ruă tưp. Dŭm ƀĭng hgŭm mđĭ kyar ăt bi mni kơ Việt Nam dưi mâo leh boh tŭ dưn hlăm bruă hluê ngă hdră tlŏ mgang vaccine./.

H’Nêč pô mblang