Khua knŭk kna Phạm Minh Chính lehanăn Khua phŭn bruă Mary Ng m’ak kyua klei bi mjĕ ƀĭng hgŭm kluôm dua ala čar dôk đĭ kyar hlăm djăp mta ra bruă. Ară anei, Canada jing ƀĭng hgŭm bruă mnia mblei prŏng tal 3 mơ̆ng Việt Nam hlăm krĭng Amrĭk lehanăn Việt Nam jing ƀĭng hgŭm mnia mblei prŏng mơ̆ng Canada hlăm krĭng ASEAN. Khă snăn, klei găl bi hgŭm mđĭ kyar plah wah dua ala čar dôk prŏng, boh nik dŭm bruă dôk mâo klei găl, kyua anăn brei ba yua jih klei găl anei hluê hŏng hdră bi hgŭm dua nah lehanăn lu tĭng. Khua knŭk kna Phạm Minh Chính mtă kơ dua tĭng brei bi hgŭm kjăp hĭn čiăng mtrŭt mđĭ hdră bi hgŭm hlăm bruă mnia mblei, duh bi liê, bi mlih mtah, bi mlih mrô, kdrăp mrâo, hdră mkra mjing, hdră mdrơ̆ng hŏng klei bi mlih yan adiê, bruă pui kmlă, bruă kreh knhâo, bruă mtô bi hriăm…

Khua knŭk kna lač jăk lehanăn čang hmăng Canada mđing mjing djăp klei găl čiăng kơ êpul mnuih Việt Nam ti Canada hdĭp, mă bruă, hriăm hră jăk găl, čang hmăng kơ Canada lŏ dơ̆ng đru hdră mjuăt bi hriăm phung hđeh Việt Nam dôk hriăm ti Canada.