Tlam hruê 11/11, ti Anôk bruă Knŭk kna, Khua knŭk kna Phạm Minh Chính drông leh Khua phŭn bruă Mnuih ngă bruă lehanăn đru kơ ala ƀuôn ala čar Lào Phosay Sayasone (Phô-xay Xay-a-xon). Khua knŭk kna bi êdah klei mơak anăp klei bi mjĕ hgŭm bruă jăk siam Việt Nam – Lào lŏ dơ̆ng đĭ kyar jăk siam, hơĭt kjăp hlăk krĭng wăl lehanăn tar rŏng lăn mâo lu klei amâo hơĭt.

Khua knŭk kna mñă klă Việt Nam srăng hrăm mbĭt, đru mguôp mbĭt hŏng Lao mtrŭt mđĭ klei hơĭt kjăp lehanăn đĭ kyar. Ti knăm anei, Khua knŭk kna mtă kơ dua Khua phŭn bruă mđĭ hdră bi hgŭm, mđing ksiêm dlăng hdră êlan hgŭm bruă hlăm dŭm mta bruă mrâo lehanăn klei đru kơ mnuih mâo bruă tŭ dưn, djŏ guôp hŏng boh klei ară anei. Hluê anăn, dua tĭng srăng siñê klei kuôl kă bi hgŭm bruă kñăm pŏk mlar dŭm bruă phŭn, mtrŭt mđĭ hdră kah mbha klei hâo hưn, klei thâo kriê dlăng lehanăn hdră bi blŭ hrăm kơ hdră mtrŭn./.