Khua knŭk kna bi êdah klei hơ̆k mơak ti anăp klei đĭ kyar ktang, kluôm dhuôm leh anăn klă sĭt hlăm klei mjĕ giăm Việt Nam – Australia, mñă ktang bruă mđĭ hnơ̆ng klei bi hgŭm kluôm dhuôm jing boh tŭ mơ̆ng klei gĭr ktưn mơ̆ng jih dua tĭng hlăm êbeh 50 thŭn đĭ kyar klei mjĕ giăm.

Khua knŭk kna Phạm Minh Chính lač jăk kơ Australia dôk hluê ngă lu hdră êlan bi mguôp klă klơ̆ng, tŭ dưn, đru kơ Việt Nam hlăm lu mta bruă mơ̆ng bruă lĭng kahan, răng mgang klei êđăp ênang, mtô mjuăt bi hriăm, kreh knhâo mrâo mrang, mlih mrâo hŏng klei mbruă leh anăn bi mlih yan adiê, mñă kơ dua tĭng lŏ dơ̆ng bi mguôp êlam hĭn, năng hŏng klei bi mguôp hdră êlan kluôm dhuôm. Dua čô khua gĭt gai tŭ ư lŏ mtrŭt mđĭ klei blŭ hrăm, kah mbha klei hưn, mđĭ hĭn klei thâo leh anăn klei đăo knang hdơ̆ng pô, bi êlam hĭn klei bi mguôp bruă lĭng kahan, răng mgang klei êđăp ênang, mtrŭt mđĭ klei bi mguôp bruă duh mkra tŭ dưn hĭn.