APM Holding jing êpul grup mnia blei leh anăn duh bi liê kluôm rŏng lăn, ngă bruă hlăm lu mta, hŏng hƀuê ênuk mkŏ mjing 120 thŭn, êpul grup mâo hlăm 130 ala čar hŏng êbeh 1 êtuh êbâo čô mă bruă. Khua knŭk kna  bi mni kơ klei găl prăk bi liê, kdrăp mrâo leh anăn klei thâo kriê dlăng mrâo mrang ăt msĕ mơh bruă bi liê mơ̆ng êpul grup APM Holding hlăm Việt Nam, đru hlăm klei mđĭ kyar bruă êa ksĭ leh anăn bruă duh mkra Việt Nam.

Khua knŭk kna  brei thâo Việt Nam mâo êbeh 3.200 km hang ksĭ, dôk hlăm êpul 20 ala čar mâo bruă duh mkra mnia blei prŏng hĭn. Việt Nam dôk mđĭ  kyar anôk bruă êlan klông nah gŭ, hlăm anăn mâo anôk bruă dŭ mdiăng hlăm êa ksĭ leh anăn hô̆ pui hlăm êa ksĭ čiăng bi hrŏ bi liê logistics dôk đĭ, mđĭ klei dưi bi ktưn mơ̆ng mnơ̆ng hơ̆ng leh anăn bruă duh mkra. Khua knŭk kna mtă kơ êpul grup ksiêm dlăng, hgŭm hlăm đa đa hdră bruă klă klơ̆ng Việt Nam dôk iêô mthưr bi liê msĕ si kdrŭn ksĭ Liên Chiểu (Đà Nẵng), kdrŭn ksĭ prŏng Cần Giờ (ƀuôn prŏng Hồ Chí Minh), đa đa kdrŭn ksĭ mkăn ti kwar Dưr, kwar Krah,  Yŭ Kwar Dhŭng.