Ti knăm anei, dua tĭng tŭ ư mđĭ hĭn klei bi mjĕ dua Đảng, dua ala čar wưng êgao mâo leh knhuang đĭ kyar jăk siam, boh nik dŭm gưl hiu čhưn mơ̆ng Khua gĭt gai Đảng. Khua knŭk kna Phạm Minh Chính mñă klă Đảng, Knŭk kna Việt Nam dlăng myuôm klei bi mjĕ hŏng China, jing klei hrŏng ruah, klei mđing tal êlâo hlăm hdră êlan bi mjĕ hŏng tač êngao mơ̆ng Việt Nam.

Khua knŭk kna mtă hlăm wưng ti anăp, dua tĭng lŏ dơ̆ng mđĭ hdră bi trông gưl dlông lehanăn dŭm gưl, mđĭ klei bhiăn bi hgŭm, mjing boh kdrŭt mđĭ kyar kơ hdră bi hgŭm dua ala čar. K’iăng khua Anôk bruă kƀĭn ala China Trương Khánh Vĩ mñă, China dlăng myuôm klei bi mjĕ hŏng Việt Nam, dlăng anei jing klei mđing mrô sa hlăm hdră êlan hŏng tač êngao mơ̆ng China kñăm mtrŭt mđĭ Klei bi mjĕ ƀĭng hgŭm phŭn, kluôm dhuôm, êpul êya êdei anăp Việt Nam – China mâo boh tŭ yuôm amâo mdei mđĭ kyar êlam hĭn, klă sĭt hĭn hlăm wưng ti anăp./.