Khua knŭk kna mñă, Việt Nam dlăng myuôm klei mđĭ kyar bi hgŭm hŏng New Zealand.  Hlăm wưng kơ anăp, ñu mtă kơ dua tĭng gĭr pŏk ngă, bi klă klơ̆ng klei kuôl kă gưl dlông hŏng dŭm hdră bruă, hdră bi hgŭm, đru ba klei bi mjĕ dua ala čar ti hnơ̆ng mrâo; mđĭ klei bi trông êpul leh anăn dŭm gưl, mđĭ klei bi hgŭm bruă mnia blei - duh mkra- bi liê, hnưm ba prăk hrui wĭt mnia blei dua nah mâo 3 êklai USD hlăm 2 thŭn kơ anăp. Dua tĭng tŭ ư lŏ dơ̆ng bi hgŭm kjăp leh anăn gĭr bi nao ai hlăm dŭm klei bi kƀĭn lu tĭng; bi tŭ ư bi hgŭm tŭ dưn hlăm wưng Việt Nam ngă bruă klam ala čar gĭt gai klei bi hgŭm ASEAN - New Zealand (7/2024 - 7/2027).

Bi trông kơ Êa ksĭ Ngŏ, dua tĭng bi tŭ ư nao ai hŏng klei mĭn ASEAN kơ Êa ksĭ Ngŏ, msir mgaih klei bi mmiă hŏng klei êđăp ênang mơ̆ng tur knơ̆ng hdră bhiăn lu ala čar, hlăm anăn mâo UNCLOS 1982, rơ̆ng êđăp ênang, êngiê hlăm êa ksĭ leh anăn wăl adiê ti Êa ksĭ Ngŏ.