Hlăm mmông tŭ drông, dua tĭng tŭ ư mđĭ hĭn klei bi trông êpul gưl dlông leh anăn dŭm gưl, dŭm alŭ wăl, mñă klă klei bi tuôm jêñ jêñ plah wah phung khua êmua dua lăn čar srăng đru bi kjăp, mđĭ hĭn klei đăo knang bruă kđi čar leh anăn klei bi mguôp kluôm dhuôm dua tĭng.

Khua mil čhil Marcos Jr. tŭ ư hŏng klei mñă mơ̆ng Khua knŭk kna Phạm Minh Chính kơ bruă mtrŭt mđĭ klei bi mguôp hlăm dŭm mta bruă adôk mâo lu klei găl msĕ si mtô mjuăt bi hriăm, kreh knhâo mrâo mrang, hiu čhưn ênguê, dhar kreh, mjĕ mjuk mnuih ƀuôn sang, bi mguôp alŭ wăl. Bi trông kơ dŭm boh klei tar rŏng lăn leh anăn alŭ wăl, dua čô khua gĭt gai yap yuôm bhăn bruă dua ala čar bi mguôp kjăp hlăm dŭm klei kƀĭn hlăm alŭ wăl leh anăn tar rŏng lăn msĕ si ASEAN, Êpul hgŭm lu ala čar, APEC, ASEM, mñă klă bruă rơ̆ng kơ klei bi mguôp leh anăn bruă klam mơ̆ng ASEAN, sa ai mkŏ mjing sa êpul êya ASEAN kjăp ktang, bi mguôp leh anăn čŏng pô./.