VOV4.Êđê- Hruê 30/3/2022 ti Anôk bruă knŭk kna, Khua knŭk kna Phạm Minh Chính drông leh Pô bi ala Mi ti Việt Nam Marc E. Knapper hriê kkuh ƀri Pô bi ala mphŭn klam mă bruă ti ala čar drei. Ti knăm anei, Khua knŭk kna h’êč hmưi kơ Pô bi ala Marc E. Knapper mâo leh Khua mil čhil Joe Biden jao klei đua klam mrâo lehanăn lŏ wĭt ti Hà Nội hŏng k’hưm mrâo jing Pô bi ala; bi êdah klei đăo knang hŏng k’hưm păn bruă mrâo; Pô bi ala srăng đru mguôp hĭn kơ klei bi mjĕ ƀĭng hgŭm kluôm dhuôm plah wah dua ala čar. Khua knŭk kna mñă klă, Mi jing sa hlăm dŭm ƀĭng hgŭm yuôm bhăn mơ̆ng Việt Nam lehanăn Việt Nam čang hmăng hrăm mbĭt hŏng Mi ba klei bi mjĕ ƀĭng hgŭm kluôm dhuôm nao êlam hĭn, tŭ dưn, klă sĭt hluê hŏng klei bhiăn mpŭ hdơ̆ng găp, klei dưi kiă kriê kluôm ênŭm krĭng lăn, klei bhiăn bruă kđi čar lehanăn dŭm klei bhiăn mdê mkăn. Pô bi ala Mi Marc E. Knapper bi êdah klei m’ak hlăk dưi lŏ wĭt mă bruă ti Việt Nam, bi mni kơ klei đĭ kyar mơ̆ng Việt Nam hlăm djăp mta bruă, boh nik hlăm hdră gang mkhư̆ klei ruă tưp lehanăn lŏ krŭ wĭt hdră duh mkra êdei kơ klei ruă tưp./.

Pô mblang: H’Nêč Êñuôl